Annar úrslitaleikur Aftureldingar og FH um Íslandsmeistaratitilinn í handknattleik karla fer fram að Varmá í kvöld. Bjarki Bóasson og Gunnar Óli Gústafsson dómarar eiga að flauta til leiks klukkan 19.40.
Afturelding hafði betur í fyrstu viðureigninni sem fram fór í Kaplakrika á sunnudagskvöld, 32:29. Vinna þarf þrjá leiki til þess að vera Íslandsmeistari. Þar af leiðandi er ljóst að nóg er eftir af úrslitakeppninni.
Mikil aðsókn hefur verið í aðgöngumiða á leikinn í kvöld, eins og þann fyrsta sem fram fór í Kaplakrika. Reiknað er með að á annað þúsund áhorfendur leggi leið sína að Varmá til þess að hvetja liðin til dáða. Forráðamenn Aftureldingar reyna eftir megni að nýta þá aðstöðu sem er fyrir hendi til þess að taka sem best á móti sem flestum
Upphitun meðal stuðningsmanna hefst klukkan 17. Matur og drykkur verður til sölu auk ýmis varnings í litum Aftureldingar. Opið verður leiksvæði fyrir börn. Einnig verða leikin lög af hljómplötum með von um að það liðki fyrir að fólki hlaupi kapp í kinn.
Í opinni útsendingu
Þeir sem ekki komast að Varmá geta fylgst með útsendingu frá leiknum í opinni dagskrá í sjónvarpi Símans a.m.k. frá klukkan 19.40, e.t.v. fyrr. Þeir sem velja frekar handboltapassann eiga einnig kost á horfa á útsendingu frá viðureigninni.
Þriðji leikur FH og Aftureldingar fer fram í Kaplakrika á sunnudagskvöld.
