Blásið verður til leiks í 13. umferð Olísdeildar karla í kvöld í íþróttahúsinu að Varmá í Mosfellsbæ þegar Afturelding og Fram leiða saman hesta sína.
Afturelding situr í 5. sæti deildarinnar með 15 stig að loknum 12 leikjum eftir stóran sigur á Þór á Akureyri á mánudagskvöld, 36:24.
Framarar eru í 9. sæti eð 12 stig. Framarar unnu KA á heimavelli á sunnudaginn og voru þar með fyrstir til að vinna KA í rúman mánuð. KA-liðið hafði þá leikið sjö leiki í röð í Olísdeildinni og í bikarkeppninni án taps.
Jafntefli var í fyrri leik Fram og Aftureldingar í Olísdeildinni á þessari leiktíð, 25:25, í æsispennandi viðureign fimmtudaginn 17. september.
Olísdeild karla:
Varmá: Afturelding – Fram, kl. 19.30 – sýndur á Stöð2Sport.