Fjórða viðureign Hauka og Aftureldingar í undanúrslitum Olísdeildar karla í handknattleik fer fram á Ásvöllum í Hafnarfirði í dag. Flautað verður til leiks klukkan 16. Vinni Haukar leikinn tryggja þeir sér sæti í úrslitum um Íslandsmeistaratitilinn gegn ÍBV. Lánist Aftureldingu að vinna á Ásvöllum mætast liðin í oddaleik á þriðjudaginn, nánast ofan í annarri viðureign, öðrum úrslitaleik Vals og ÍBV um Íslandsmeistaratitilinn í kvennaflokki.
Vart hefur farið framhjá áhugafólki um handknattleik að tvær síðustu viðureignir Hauka og Aftureldingar hafa dregið dilk á eftir sér og á stundum hafa stóru orðin síst verið spöruð. Dómgæslan var í kastljósinu og hafa ekki allir verið á eitt sáttir. M.a. var rautt spjald sem Ihor Kopyshynskyi leikmaður Aftureldingar fékk undir lok leiks liðanna á síðasta fimmtudag dregið til baka.
Vonandi fær handknattleikurinn að njóta sín á Ásvöllum í dag. Rétt er að minna áhorfendur á að mæta tímanlega og tryggja sér fyrr en síðar miða á Stubb sem áhugafólki um boltaíþróttir er að góðu kunnur.
Leikur dagsins
Ásvellir: Haukar – Afturelding (2:1) kl. 16 – sýndur á Stöð2sport.
