- Auglýsing -
Einn leikur er á dagskrá dagsins á Íslandsmótinu í handknattleik í kvöld. HK úr Kópavogi sækir Hörð á Ísafirði heim í íþróttahúsið á Torfnesi. Flautað verður til leiks klukkan 18.30.
HK situr í fjórða sæti Grill 66-deildar karla með 10 stig að loknum sjö leikjum og getur með sigri í kvöld komist upp að hlið ungmennaliðs Vals og Fjölnis með 12 stig, þá eftir átta leiki. HK hefur unnið tvo síðustu leiki sína stórt, gegn Val U og Haukum U.
Harðarmenn töpuðu naumlega fyrir Fjölni um liðna helgi í Dalhúsum með tveggja marka mun, 35:33. Þeir unnu hins vegar ungmennalið Selfoss þar á undan í hörkuleik á Selfossi, 36:32.
Sem fyrr verður áhorfendum ekki heimilt að koma í íþróttahúsið á Torfnesi. Bein útsending verður á netinu á neðangreindri slóð.
- Auglýsing -