Síðasti leikur Íslandsmótsins í handknattleik á keppnistímabilinu verður í kvöld þegar Haukar og Valur mætast í síðari úrslitaleiknum um Íslandsmeistaratitilinn í handknattleik karla í Schenkerhöllinni á Ásvöllum. Flautað verður til leiks klukkan 19.30.
Valur hefur þriggja marka forskot eftir sigur, 32:29, í fyrri viðureigninni sem fram fór í Origohöllinni á þriðjudagskvöld.
Ekki er annað vitað en að liðin verði eins skipuð í leiknum í kvöld og í viðureigninni á þriðjudagskvöld.
Almenn miðasala er á Stubb en forsala hefst á Ásvöllum klukkan 12.30 í dag.
Eftirfarandi reglur gilda í úrslitakeppninni.
Vinningsröð liða þegar miðað er við Evrópukeppnisfyrirkomulag.
1.Stigasöfnun:
Lið vinnur sér inn stig sem hér segir:
a)sigur, 2 stig.
b)jafntefli, 1 stig.
c)tap, 0 stig.
2.Vinningsröð liða:
Ef liðin hafa jafnmörg stig eftir tvo leiki verður ekki framlengt. Þá verður vinningsröðin, þ.e. hvort liðið verður Íslandsmeistari ákveðin í þessari röð:
a)markamismunur.
b)fleiri mörk skoruð á útivelli.
c)vítakastkeppni.
Fara skal eftir leikreglum HSÍ og IHF um framkvæmd vítakastkeppni.
