Oddaleikur í undanúrslitum umspils Olísdeildar karla í handknattleik verður háður á Ísafirði í kvöld þegar Hörður og Þór eigast við. Hörður vann heimaleikinn á síðasta þriðjudag, 28:25. Þórsarar svöruðu fyrir sig með fimm marka sigri í Höllinni á Akureyri á föstudaginn, 31:26.
Endijs Kusners leikmaður Harðar mætir til leiks á ný með samherjum sínum í kvöld. Hann tók út leikbann á föstudaginn.
Önnur umferð úrslitakeppni Olísdeildar kvenna verður einnig í algleymi í kvöld. Stjarnan fær Hauka í heimsókn í Hekluhöllina í Garðabæ klukkan 18. Eftir 13 marka tap í fyrstu viðureign liðanna á föstudagskvöld á Ásvöllum er verk að vinna fyrir Stjörnuliðið. Tap þýðir að Stjarnan fellur úr leik. Með sigri kemur til oddaleiks á Ásvöllum á fimmtudagskvöld.
Svipaða sögu er að segja af rimmu ÍR og ÍBV sem hefst í Skógarseli klukkan 19.40. ÍR þarf á sigri að halda til þess að halda lífi í rimmunni. ÍBV hafði betur á heimavelli í fyrsta leiknum, 30:20 á föstudag. Takist ÍR að vinna á heimavelli verður oddaleikur um sæti í undanúrslitum í Vestmannaeyjum á fimmtudagskvöld.
Leikir kvöldsins
Olísdeild kvenna, 1. umferð, 2. umferð:
Hekluhöllin: Stjarnan – Haukar (0:1), kl. 18.
Skógarsel: ÍR – ÍBV (0:1), kl. 19.40.
Umspil Olísdeildar karla, oddaleikur:
Ísafjörður: Hörður – Þór (1:1), kl. 19.30.
Leikirnir verða sendir út á Handboltapassanum auk þess sem viðureign ÍR og ÍBV verður send út í opinni dagskrá í sjónvarpi Símans.
Sjá einnig:
Umspil Olís kvenna: leikjadagskrá og úrslit
Umspil Olís karla: leikjadagskrá og úrslit
Olís kvenna: Úrslitakeppni, leikjadagskrá
Olís karla: Leikjadagskrá, úrslitakeppni
