Síðasta umferð Olísdeildar karla í handknattleik fer fram í dag. Allir leikir hefjast klukkan 16.
Í efri hluta deildarinnar etja grannliðin Afturelding og Fram kappi um fjórða sætið. Ef ÍBV verður á í messunni í heimsókn sinni til deildarmeistara Vals er ekki hægt að útiloka að annað hvort liðið rjúki upp í þriðja sætið farnist þeim vel í viðureignum sínum. Fjögur efstu sæti deildarinnar gefa rétt á heimaleik komi til oddaviðureigna í átta liða úrslitum. Spennan er þar með langt í frá úr sögunni í efri hlutanum þótt Valur og FH eigi tvö efstu sæti vís.
Áfram er spenna í kapphlaupinu um áttunda sæti deildarinnar. Haukar eru tveimur stigum á undan Gróttu. Komi sú staða upp eftir leikina í dag að Haukar og Grótta verði jöfn að stigum hreppir Grótta áttunda sætið á betri stöðu í innbyrðis viðureignum. Haukar taka á móti föllnu liði Harðar á Ásvöllum á sama tíma og Grótta fær KA í heimsókn.
KA berst fyrir lífí sínu í deildinni. Liðið situr í 10. sæti, aðeins stigi fyrir ofan ÍR sem sækir Fram heim í Úlfarsárdal.
Olísdeild karla, 22. og síðasta umferð:
Úlfarsárdalur: Fram – ÍR, kl 16 – sýndur á Framtv.
Kaplakriki: FH – Selfoss, kl. 16 – sýndur á FHtv.
Hertzhöllin: Grótta – KA, kl. 16 – sýndur á Gróttatv.
Origohöllin: Valur – ÍBV, kl. 16 – sýndur á Stöð2sport.
Ásvellir: Haukar – Hörður, kl. 16 – sýndur á Haukartv.
Varmá: Afturelding – Stjarnan, kl. 16 – sýndur á Stöð2sport.
Staðan í Olísdeild karla.
Handbolti.is fylgist með öllum leikjum dagsins eftir bestu getu.
