Þriðja umferð Olísdeildar kvenna hefst í kvöld og það með sannkölluðum toppleik. Í Origohöllinni mætast að margra mati tvö bestu kvennalið landsins, Valur og ÍBV, kl. 19.30. Leiknum er flýtt vegna þátttöku Vals í Evrópubikarkeppninni um næstu helgi þegar rúmenska liðið HC Dunara Barila kemur til landsins.
Valur og ÍBV hafa byrjað Olísdeildina af miklum móð. Valur lagði Fram, 29:20, í fyrstu umferð og ÍBV vann KA/Þór með sömu markatölu í viðureign á Akureyri. Valskonur kjöldrógu liðsmenn KA/Þórs, 36:17, á föstudagskvöldið. Daginn eftir vann ÍBV lið Hauka, 29:21, í Vestmannaeyjum.
Nítján daga eru síðan Valur og ÍBV áttust við í Meistarakeppni HSÍ. Valur vann með sjö marka mun, 30:23.
Leikur kvöldsins – Olísdeild kvenna:
Origohöllin: Valur – ÍBV, kl. 19.30.
Staðan og næstu leikir í Olísdeild kvenna.
Útsendingu frá leiknum verður að finna á rásum sjónvarps Símans.
Einnig verður textalýsing frá leiknum á handbolti.is.
