Síðasta umferð í Olísdeild kvenna í handknattleik fer fram í dag með fjórum leikjum. Fram varð deildarmeistari á síðasta laugardag. Eftirvænting ríkir fyrir viðureign Vals og KA/Þórs sem fram fer í Origohöll Valsara og hefst klukkan 16. Hvort liðið hreppir annað sætið? Tvö efstu liðin sitja yfir í fyrstu umferð úrslitakeppninnar meðan liðin sem hafna í þriðja til sjötta sæti reyna með sér.
KA/Þór er stigi fyrir ofan Val um þessar mundir. Þar af leiðandi dugir Val ekkert annað en sigur til þess að hreppa annað sætið. Sigur eða jafntefli kemur KA/Þór að jafn miklum notum.
Stjarnan og Haukar mætast í TM-höllinni í Garðabæ í uppgjöri um fimmta sætið. Stjarnan er tveimur stigum á eftir og þarf að vinna leikinn til að hafa sætaskipti við Hauka. Liðin unnu hvort sína innbyrðisviðureignina í vetur. Haukar unnu í TM-höllinni í nóvember, 32:23, en Stjarnan sneri við taflinu í heimsókn sinni á Ásvelli skömmu eftir áramót, 28:22. Haukum nægir eitt stig úr leiknum til að halda fimmta sæta vegna hagstæðari markatölu í innbyrðisleikjum.
Alla jafna fara allir leikir í lokaumferð deildarkeppninnar fram á sama tíma. Undantekning er gerð að þessu sinni á leik ÍBV og Fram. Úrslit leiksins hafa engin áhrif á röð liðanna. Leiknum var þar af leiðandi flýtt til klukkan 13 vegna ferðáætlunar Framliðsins sem einnig sækir ÍBV heim með ungmennalið sitt.
Afturelding kveður Olísdeild kvenna með því að taka á móti HK á Varmá klukkan 16. HK situr í sjöunda sæti og tekur þátt í umspilskeppni um sæti í Olísdeildinni síðar í þessum mánuði og í byrjun maí.
Leikir dagsins
Olísdeild kvenna – lokaumferð:
Vestmannaeyjar: ÍBV – Fram, kl. 13 – sýndur á ÍBVtv.
TM-höllin: Stjarnan – Haukar, kl. 16 – sýndur á Stjarnan handbolti TV.
Origohöllin: Valur – KA/Þór, kl. 16 – sýndur á Stöð2sport.
Varmá: Afturelding – HK, kl. 16 – sýndur á Aftureldingtv.
Stöðuna í Olísdeild kvenna er unnt að sjá hér.
Grill66-deild kvenna:
Vestmannaeyjar: ÍBV U – Fram U, kl. 15.
Stöðuna í Grill66-deild kvenna er unnt að sjá hér.
