Nýkrýndir bikarmeistarar Vals taka á móti ÍBV í Olísdeild kvenna, 17. umferð, klukkan 14 í dag. Lið félaganna mættust síðast í undanúrslitum Coca Cola-bikarsins fyrir rúmri viku og þá hafði Valur betur, 28:20. ÍBV lagði Íslandsmeistara KA/Þórs á fimmtudagskvöld, 26:24, í fyrsta leik Olísdeildar eftir að þráðurinn var tekinn upp á nýjan leik eftir nokkurt hlé sem gert var vegna landsleikja og til að leiða til lykta keppni í Coca Cola-bikarnum.
Valur er í öðru sæti Olísdeildar þremur stigum á eftir Fram að loknum 16 leikjum. Fram vann stórsigur á HK í gærkvöld.
ÍBV, sem unnið hefur sex leiki í röð í Olísdeildinni, situr í fimmta sæti með 16 stig að loknum 13 leikjum en getur með sigri í Origohöllinni í dag náð fjórða sæti af Haukum.
Stjarnan, sem er tveimur stigum á eftir ÍBV, sækir Aftureldingu heim á Varmá klukkan 16.
Síðasti leikur 17. umferðar Olísdeildar kvenna fer fram á morgun þegar Íslandsmeistarar KA/Þórs taka á móti Haukum úr Hafnarfirði.
Síðari vináttulandsleikur Íslands og Danmerkur í karlaflokki, með landsliðum skipuðum 20 ára og yngri, hefst á Ásvöllum klukkan 16 í dag. Íslenska liðið vann fyrri viðureignina í gærkvöld, 28:22.
Olísdeild kvenna:
Origohöllin: Valur – ÍBV, kl. 14 – sýndur á Stöð2Sport.
Varmá: Afturelding – Stjarnan, kl. 16 – sýndur á Aftureldingtv.
Stöðu og næstu leiki í Olísdeild kvenna er að finna hér.
U20 ára landslið karla, vináttuleikur:
Ásvellir: Ísland – Danmörk, kl. 16.
Landsleiknum verður streymt á Youtuberás HSÍ. Streymið verður ennfremur aðgengilegt á handbolti.is.
