Dagur Gautason skoraði fimm mörk fyrir ØIF Arendal í kvöld þegar liðið var hársbreidd frá því að vinna bæði stigin sem voru í boði í heimsókn til Elverum í norsku úrvalsdeildinni í handknattleik. Péter Lukács jafnaði metin fyrir Elverum á síðustu sekúndum leiksins, 30:30.
Mega heimamenn teljast góðir að sleppa með skrekkinn í jöfnum leik þótt úrslitin verði að teljast sanngjörn eftir mjög jafnan leik í Terningen Arena í Elverum. Að loknum fyrri hálfleik var stað jöfn, 15:15.
ØIF Arendal er þriðja sæti úrvalsdeildarinnar með 28 stig eftir 19 leiki. Elverum er í sætinu fyrir ofan með 33 stig. Kolstad er sem fyrr efst með 35 stig. Kolstad lék ekki í kvöld vegna þátttöku sinnar í Meistaradeild Evrópu annað kvöld.
Dagur hefur leikið afar vel með ØIF Arendal á leiktíðinni en hann gekk til liðs við félagið frá KA á síðasta sumri. Dagur var þrjá mánuði í röð í liði mánaðarins fyrir áramót auk þess að eiga sæti í úrvalsliði fyrri hluta deildarinnar sem valið var í upphafi ársins.
Stöðuna í norsku úrvalsdeildinni og í fleiri deildum evrópsks handknattleiks er að finna hér.
