Daníel Freyr Andrésson og félagar í Lemvig unnu mikilvægan sigur í botnbaráttu dönsku úrvalsdeildarinnar í kvöld er þeir sóttu liðsmenn Holstebro heim, 29:28. Lemvig hefur þar með unnið fimm leiki af 17 og er í 11. sæti deildarinnar eftir mikla keppni en aðeins munar tveimur stigum á fjórum liðum sem er í 10. til 13. sæti, SønderjyskE, Lemvig, Mors-Thy og Nordsjælland.
Daníel Freyr kom ekki mikið við sögu í leiknum í kvöld. Hann varði eitt skot, 17%. Simon Egtved félagi hans varði vel, 37%.
Halldór Jóhann Sigfússon er aðstoðarþjálfari Holstebro sem er í 7. sæti með 17 stig eftir 17 leiki.
Sigurmark beint úr aukakasti
Mads Kjeldgaard Andersen skoraði sigurmark Bjerringbro/Silkeborg, 29:28, beint úr aukakasti eftir að leiktíminn var úti í heimsókn liðsins til Fredericia í kvöld. Guðmundur Þórður Guðmundsson er þjálfari Fredericia Håndboldklub sem er í áttunda sæti með 16 stig.
Bjerringbro/Silkeborg er hinsvegar í þriðja sæti með 26 stig og er þremur stigum og einum leik á eftir GOG sem trónir á toppnum.
Einar Þorsteinn Ólafsson var ekki áberandi í leik Fredericia Håndboldklub að þessu sinni.
Sigurmark Andersen í Fredericia í kvöld.
