Handknattleiksmaðurinn Daníel Örn Griffin hefur skrifað undir nýjan tveggja ára samning við Gróttu. Daníel Örn mætir þar með galvaskur til leiks með Gróttu liðinu á næsta keppnistímabili en hann hefur verið fjarri góðu gamni alla yfirstandandi leiktíð eftir að hafa slitið krossband í hné fyrir um ári.
Daníel Örn kom til liðs við Gróttu sumarið 2020 frá KA en þar áður lék hann upp yngri flokka og steig sín fyrstu skref í meistaraflokki með ÍBV. Daníel Örn var m.a. í Íslandsmeistaraliði ÍBV vorið 2018.
Daníel Örn Griffin er örvhentur og spilar sem hægri skytta. Hann er jafnvígur á báðum endum vallarins, kröftugur sóknarmaður og öflugur varnarmaður. Tímabilið 2020-2021 skoraði hann 73 mörk í 19 leikjum í Olísdeildinni.
„Það eru mikil gleðitíðindi að Daníel verði áfram hjá okkur í Gróttu enda frábær leikmaður sem gaman verður að sjá aftur á parketinu eftir árs fjarveru. Daníel tók miklum framförum á seinasta tímabili og ég er sannfærður að hann verði lykilleikmaður liðsins á næsta tímabili,“ er haft eftir Arnari Daða Arnarssyni, þjálfari Gróttu í tilkynningu frá handknattleiksdeild.
- Auglýsing -
