Handknattleiksmaðurinn Daníel Þór Ingason verður ekki áfram í herbúðum danska úrvalsdeildarliðsins Ribe-Esbjerg eftir yfirstandandi keppnistímabil. Hann staðfesti þetta við handbolta.is. Daníel Þór er vongóður um að ganga frá samningi við annað lið á næstunni.
„Það hefur legið fyrir síðan í febrúar að ég verð ekki áfram hjá Ribe-Esbjerg. Það verða miklar breytingar eftir keppnistímabilið og sjö eða átta leikmenn sem fara frá liðinu,“ sagði Daníel Þór við handbolta.is. Ribe-Esbjerg náði sér ekki á strik í dönsku úrvalsdeildinni, einkum framan af, og tókst ekki að vera í hópi átta efstu liða deildarinnar sem leika nú um danska meistaratitilinn.
Daníel Þór er að ljúka sínu öðru keppnistímabili með Ribe-Esbjerg. Hann kom til liðsins sumarið 2019 frá Haukum. Daníel Þór hefur á tíðum átt sæti í íslenska landsliðinu og lék m.a. með því á heimsmeistaramótinu í Þýskalandi 2019.
Hér fyrir neðan er að finna nokkur mörk hjá Daníel Þór í leik við Fredericia í vetur.
