Díana Dögg og samherjar hennar í BSV Sachsen Zwickau halda ótrauðar áfram á sigurbraut í þýsku 2. deildinni í handknattleik. Í dag unnu þær TSV Nord Harrislee, 27:24, á útivelli eftir að hafa verið tveimur mörkum undir í hálfleik, 15:13.
BSV Sachsen Zwickau heldur þar með áfram efsta sæti deildarinnar með 39 stig eftir 22 leiki en liðið á eftir fjóra leiki. Füchse Berlin er fjórum stigum eftir tap, 23:22, fyrir Wuppertal á heimavelli í kvöld. Herrenberg er fimm stigum á eftir BSV Sachsen Zwickau og leikur á morgun.
Díana Dögg lék á miðjunni í sókn í síðari hálfleik og stóð svo sannarlega fyrir sínu. Hún skapaði fimm færi, vann fjögur vítakaöst og átti fimm stoðsendingar og skoraði eitt mark.
„Þetta var ágætur og erfiður útisigur,“ sagði Díana Dögg við handbolta.is. „Við fundum ekki alveg taktinn í fyrri hálfleik en hann batnaði í síðari hálfleik,“ sagði Díana Dögg sem kemur til móts við íslenska landsliðið í Ljubljana á fimmtudaginn. Hún verður í eldlínunni með landsliðinu á næsta laugardag og leikur þar af leiðandi ekki með samherjum sínum í BSV Sachsen Zwickau þegar þær mæta TG Nürtingen.
Efsta lið annarrar deildar eftir 26 umferðir fer rakleitt upp í 1. deild en liðið í öðru fer í umspil um keppnisrétt.
