Donni er á réttri leið

Landsliðsmaðurinn Kristján Örn Kristjánsson, Donni, er að sækja í sig veðrið eftir að hafa meiðst á ökkla á æfingu með félagsliði sínu, PAUC-Aix í Frakklandi, fyrir um hálfum mánuði.

„Ég var einmitt á fyrstu handboltaæfingunni minni í gær eftir tognunina. Batinn er skjótari en læknirinn bjóst við,“ sagði Donni glaður í bragði við handbolta.is í morgun.

Vegna meiðslana hefur Donni setið yfir í tveimur síðustu leikjum PAUC í frönsku 1. deildinni. Næsti leikur PAUC verður á útivelli við Nantes á sunnudaginn. Of snemmt er að segja til um á þessari stundu hvort Donni verður klár í slaginn í Nantes.