Dönsku liðin Nykøbing Falster og Ikast mætast í úrslitaleik Evrópudeildar kvenna í handknattleik á morgun. Dönsku liðin lögðu þýsku liðinu Borussia Dortmund og Thüringer HC í undanúrslitaleikjum í dag í Graz í Austurríki þar sem úrslitahelgi keppninnar fer fram.
Viðureign Nykøbing Falster og Dortmund var jöfn og spennandi. Úrslitin réðust í vítakeppni sem leikmenn Nykøbing Falster unnu, 6:4, eftir að jafnt var að loknum 60 mínútna leik, 32:32.
🥳 Quand tu qualifies tes copines pour la finale 🍿pic.twitter.com/PGDN2vnXfU
— HandNews (@HandNewsfr) May 13, 2023
Dortmund var fjórum mörkum yfir í hálfleik, 17:13. Emma Olsson fyrrverandi leikmaður Fram skoraði ekki mark fyrir Dortmund. Hún var hörð í horn að taka í vörninni og var fyrir vikið vikið af leikvelli einu sinni.
Annika Fríðheim Petersen, fyrrverandi markvörður Hauka, varði tvö skot, 16,6% þann tíma sem hún stóð í marki Nykøbing Falster.
Mia Solberg skoraði 10 mörk fyrir Nykøbing og var markahæst. Zoe Sprengers og Anna Lena Hausherr skoruðu sex mörk hvor fyrir Dortmund.
Leikmenn Ikast voru með tök á leiknum við Thüringer frá upphafi til enda. Fimm mörk skildu liðin að þegar upp var staðið, 31:26. Ikast var sjö mörkum yfir í hálfleik, 17:10. Ingvild Kristiansen skoraði átta mörk fyrir Ikast. Nathalie Henriksen skoraði 10 mörk fyrir Thüringer HC.
Úrslitaleikurinn fer fram klukkan 16 á morgun og á að vera öllum sem vilja aðgengilegur án endurgjalds á EHF tv.
