Landslið Danmerkur, skipað leikmönnum 20 ára og yngri, svaraði í dag fyrir tapið fyrir íslenska landsliðinu í gærkvöld þegar liðin mættust á Ásvöllum. Danir voru mikið beittari í síðari hálfleik í dag og skoruðu 18 mörk og alls 32 á móti 25 íslenskum mörkum. Varnarleikur og markvarsla íslenska liðsins var slök í síðari hálfleik í dag og sóknarmenn náðu sér alls ekki á strik. Ísland var yfir í hálfleik, 16:14.
Íslenska liðið var með frumkvæðið í fyrri hálfleik. Danir sóttu mjög í sig veðrið undir lok fyrri hálfleiks og skoraði til að mynda þrjú mörk í röð eftir leikhlé, 13:13. Íslensku piltarnir náðu að svara fyrir sig og vera með tveggja marka forskot í hálfleik, 16:14.
Danska liðið byrjaði síðari hálfleikinn betur. Þeir skoruðu tvö fyrstu mörkin og jöfnuðu metin. Eftir það voru Danir yfir fram í miðjan hálfleikinn. Þá var tveggja marka munuri 24:22.
Tíu mínútum fyrir leikslok var forysta Dana komin upp í fjögur mörk, 28:24. Eftir það fjaraði leikur íslenska landsliðsins jafnt og þétt út.
Mörk Íslands: Tryggvi Þórisson 7, Guðmundur Bragi Ástþórsson 6, Einar Bragi Aðalsteinsson 5, Benedikt Gunnar Óskarsson 2, Gauti Gunnarsson 2, Andri Már Rúnarsson 1, Kristófer Máni Jónasson 1, Símon Michael Guðjónsson 1.
Mörk Danmerkur: Viktor Klöve 6, Tobias Bonde Mygind 5, Joachim Lyng Als 4, Jonas Raundal 4, Oscar Von Oettingen 4, Rasmus Madsböll Wenneke 3, Gustav Wedel Bruun 2, Mikkel Lang 2, Viktor Nevers 2.
Hér fyrir neðan er upptaka af leiknum.
