Arnór Snær Óskarsson fékk draumabyrjun í fyrsta leik sínum fyrir Gummersbach í þýsku 1. deildinni í handknattleik í kvöld. Hann skoraði sex mörk í jafnmörgum skotum auk þess sem Gummersbach vann leikinn, sem var við Leipzig, 30:29. Þýski landsliðsmaðurinn Julian Köster skoraði sigurmarkið og tryggði Gummersbach sigurinn þegar 10 sekúndur voru til leiksloka. Hinsvegar vantar áfram herslumun upp á hjá Leipzig við stigasöfnunina.
Íslenskir þjálfara stýrðu báðum liðum. Guðjón Valur Sigurðsson er þjálfari Gummersbach og Rúnar Sigtryggsson er við stjórnvölin hjá Leipzig.
Arnór Snær, sem gekk til liðs við Gummersbach að láni frá Rhein-Neckar Löwen í síðustu viku skoraði fjögur mörk í fyrri hálfleik og tvö í þeim síðari. Einnig átti hann tvær stoðsendingar. Elliði Snær Viðarsson skoraði eitt mark fyrir Gummersbach. Köster var markahæstur með sjö.
Viggó Kristjánsson skoraði sjö mörk fyrir Leipzig, þar af þrjú úr vítaköstum. Honum var einnig einu sinni vikið af leikvelli. Andri Már Rúnarsson skoraði eitt mark fyrir Leipzig og átti tvær stoðsendingar. Tékkinn Matej Klima skoraði átta mörk og var markahæstur hjá Leipzig.
Göppingen er í sjöunda sæti deildarinnar með 22 stig eftir 21 leik. Leipzig er í 14. sæti með 15 stig og þarf nauðsynlega að hefja stigasöfnun til þess að sogast ekki nær neðstu liðunum.
Stöðuna í þýsku 1. deildinni og í fleiri deildum evrópsks handknattleiks er að finna hér.
Hér er líka að finna greinargóða umfjöllun um leikinn ásamt mynd af Arnóri Snæ þar sem hann hótar markskoti.
