Elvar Ásgeirsson fékk draumabyrjun með Nancy í frönsku B-deildinni í handknattleik. Hann tryggði liðinu sigur, 31:30, á Massy á heimavelli í kvöld. Elvar, sem gekk til liðs við Nancy í byrjun vikunnar, skoraði sigurmarkið þegar 11 sekúndur voru til leiksloka.
Elvar var næst markahæstur í liði Nancy með sex mörk í tíu skotum.
Sigurinn var torsóttur. Nancy var þremur mörkum undir að loknum fyrri hálfleik, 18:15, en tókst að jafna metin fljótlega í síðari hálfleik. Við tók hnífjafn leikur þar sem vart mátti á milli liðanna sjá þar til Mosfellingurinn tók sig til á síðustu sekúndum leiksins og innsiglaði sigurinn.
Nancy er í fjórða sæti deildarinnar eftir leikinn í kvöld með 20 stig að loknum 15 leikjum. Pontault er efst með 24 stig eftir sigur á Cherbourg sem er í öðru sæti með 22 stig eins og Saran sem á leik til góða.
Grétar Ari Guðjónsson og félagar í Nice er í sjötta sæti með 16 stig eins og kom fram í annarri frétt á handbolta.is í kvöld.
