Dregið verður í umspilsleikina fyrir heimsmeistaramót kvenna í handknattleik í Ljubljana laugardaginn 19. nóvember. Nafn Íslands verður þar með eftir samanlagðan 15 marka sigur á Ísrael í tveimur viðureignum hér á landi um helgina.
Til viðbótar við íslenska liðið komust Austurríki, Slóvakía, Tyrkland, Ítalía. Úkraína, Portúgal, Kósovó og Bosnía áfram úr forkeppninni sem stóð yfir síðustu daga og lauk í gær.
Tékkland sat yfir í forkeppninni og er tíunda þjóðin í fyrrgreindum hóp sem sennilega skipar neðri styrkleikaflokkinn sem dregið verður úr.
Nöfn tíu þjóða frá EM kvenna verða einnig í skálunum þegar dregið verður laugardaginn 19. nóvember.
Leikir í viku 14 og 15
Nöfnum þjóðanna 20 verður skipt í tvo styrkleikaflokka og dregin saman á einfaldan hátt til tveggja leikja sem fram fara heima og að heiman. Umspilsleikirnir fara fram í viku 14 og 15 á næsta ári, væntanlega frá 4. til 10. apríl, eða þar um bil.
Evrópa á 13 sæti á HM kvenna sem fram fer í desember 2023 auk gestgjafanna þriggja, Danmerkur, Noregs og Svíþjóðar. Þrjú lið komast beint frá EM inn á HM. Tíu bætast við að loknu umspilinu í apríl. Helmingur 32 þátttökuliða á HM 2023 verða Evrópuríki.