- Auglýsing -
- Tilkynning heilbrigðisráðherra um vægar tilslakanir á samkomutakmörkunum sem kynntar voru opinberlega valda vonbrigðum, svo ekki sé fastara að orðið kveðið. Engar tilslakanir eru gerðar vegna íþróttakappleikja.
- Íþróttaleikir mega fara fram fyrir luktum dyrum næstu vikur eins og verið hefur að undanförnu. Það er alveg óskiljanlegt að ekki skuli hafa verið veittur slaki og heimila a.m.k. 100 áhorfendum að koma á hvern leik í stærri húsunum og 50-60 í þeim minni, allt eftir hvernig aðstæður eru.
- Flest íþróttahús þar sem leikinn er handknattleikur geta vel tekið á móti a.m.k. 100 áhorfendum þar sem auðvelt væri að afmarka svæði og selja í merkt sæti þar sem reglur um fjarlægðamörk væru virt. Þannig væri ekki meira smithætta af þeim 100 áhorfendum en t.d. 150 áhorfendum í merktum sætum í leikhúsi svo dæmi sé tekið, eða 50 manns á ölknæpu. Það held ég að mér sé óhætt að fullyrða.
- Vissulega kostaði þetta umstang við að merkja sæti og girða af hólf og ganga á hverjum leik. Ég er viss um að hjá þeim öllum væru margir tilbúnir að leggja vinnu á sig fyrir félagið sitt. Einnig að standa að þrifum og sjá til þess að þeir áhorfendur sem kæmu virtu reglur.
- Miðasölukerfið er fyrir hendi í smáforriti sem félögin hafa aðgang að. Þar er á einfaldan hátt hægt að selja takmarkaðan fjölda aðgöngumiða í merkt sæti.
- Svo vel hafa íþróttafélögin staðið sig á undanförnum vikum eftir að æfingar og síðar leikir voru heimiluð að metnaður og ábyrgð er fyrir hendi að fylgja í einu öllu eftir því að gefa þeim áhorfendum sem vilja koma, upp að ákveðnu marki, til sjá kappleiki sinna liða.
- Þar með væri örlítlu lífi til viðbótar hleypt í íþróttahúsin.
- Enn þegir forysta íþróttahreyfingarinnar þunnu hljóði, skilar auðu. Henni dettur ekki einu sinni í hug að koma á framfæri athugasemdum á opinberum vettvangi. Sennilega vegna þess, eins og fyrri daginn, að það er svo óskaplega mikið að gera á bak við tjöldin. Tími er kominn til að klæðalausi keisarinn dragi tjöld sín frá.
Ívar Benediktsson, ivar@handbolti.is
- Auglýsing -
