Eftirmaður Arons Pálmarssonar hjá Aalborg Håndbold verður Slóveninn Aleks Vlah núverandi fyrirliði Celje Pivovarna Laško og besti leikmaður liðsins á keppnistímabilinu, eftir því sem fjölmiðillinn Delo í Slóveníu segir frá.
Vlah er 25 ára gamall og var markahæsti leikmaður Slóvena á HM í síðasta mánuði. Hann er ennfremur einn markahæsti leikmaður Meistaradeildar Evrópu á keppnistímabilinu með 70 mörk.
Vlah er að ljúka sínu öðru keppnistímabili með Celje Lasko. Hann kom til félagsins sumarið 2021 eftir tveggja ára dvöl hjá RK PPD Zagreb í Króatíu. Uppeldisfélag Vlah er Koper í Slóveníu.
Eftir því sem Delo greinir frá þá voru PSG og Flensburg einnig áhugasöm um að krækja í Slóvenann öfluga sem getur bæði leikið á miðjunni og í skyttustöðunni vinstra meginn.
