„Ég er orðlaus, ég er svo svekkt. Ég er 35 ára og er að hágráta yfir úrslitum í handboltaleik,“ sagði Hildigunnur Einarsdóttir leikmaður íslenska landsliðsins í samtali við handbolta.is í kvöld eftir að íslenska landsliðið gerði jafntefli við Angóla, 26:26, í síðasta leik riðlakeppni HM. Jafnteflið og lakari markatala varð til þess að íslenska landsliðið rak lestina í riðlinum en Angóla komst áfram í milliriðla. Ísland tekur þátt í keppninni um forsetabikarinn í Frederikshavn í Danmörku.
Versta tapið á ferlinum
„Ég bara trú því ekki að við séu einu marki frá milliriðlakeppninni. Þetta eru ógeðslega mikil vonbrigði. Við vissum að við gætum unnið Angólaliðið. Þegar upp er staðið erum við svo nærri því. Þetta er versta tap á ferlinum hjá mér,“ sagði aldursforseti íslenska landsliðsins, Hildigunnur Einarsdóttir í samtali við handbolta.is í DNB Arena í Stavangri í kvöld.
