„Ég vil hvetja alla FH-inga og handboltaáhugamenn til að flykkjast á bak við FH og Val sem leikur með okkur í Krikanum á næsta þriðjudag. Ég verð stórkostlega svekktur ef Kaplakriki verður ekki troðfullur á báðum leikjum,“ sagði Sigursteinn Arndal þjálfari Íslandsmeistara FH um væntanlega handboltaveislu sem FH og Valur sameinast um að bjóða upp í Kaplakrika á þriðjudaginn þegar liðin mæta Gummersbach og Porto í annarri umferð Evrópudeildarinnar í handknattleik.
Valur og Porto hefja leik klukkan 18.15 og FH og Gummersbach kl. 20.30. Seldir eru miðar sem gildir inn á báða leikina.
Miðasala á handboltaveisluna í Kaplakrika er á stubb.is – smellið hér.
Eiga skilið alvöru stuðning
„Ekki síst eiga ungu mennirnir í liðunum sem eiga sér drauma skilið að fá alvöru stuðning úr stúkunni. Þess vegna biðla ég til fólks að tryggja sér miða sem allra, allra fyrst,“ sagði Sigursteinn Arndal þjálfari FH ákveðinn.
FH heldur upp á 95 ára afmæli sitt þennan saman dag, 15. október, og þessvegna verður veisla í Kaplakrika frá morgni til kvölds.
Evrópukeppni félagsliða – fréttasíða.
