Haukar standa vel að vígi eftir fimm marka sigur í fyrri viðureigninni við Kür frá Aserbaísjan í 32-liða úrslitum Evrópubikarkeppninnar í handknattleik karla í dag, 30:25. Leikurinn fór fram í borginni Mingechevir og þar leiða lið félaganna einnig saman hesta sína á morgun klukkan 13.
Haukar komu til Mingechevir á fimmtudaginn eftir rúmlega sólarhrings ferðalag frá Íslandi en um er að ræða lengsta ferðalag íslensks félagsliðs vegna þátttöku í Evrópukeppni félagsliða.
Fyrri hálfleikur var jafn og afar spennandi í afar sérstökum aðstæðum en keppnishöllin í Mingechevir er fremur smá og virtist af útsendingu frá leiknum hvorki vera hátt til lofts né sérlega vítt til veggja.
Haukar voru yfir framan af en heimamenn náðu skyndilega þriggja marka forskoti skömmu fyrir hálfleik, 13:10. Haukum tókst að svara fyrir sig og vera með jafna stöðu í hálfleik, 13:13.
Allan síðari hálfleik voru leikmenn Hauka með undirtökin og eins til fjögurra marka forskot allt þar til á síðustu sekúndum að þeim tókst að auka forskot sitt í fimm mörk.
Síðari viðureignin hefst klukkan 13 á morgun og verður vafalaust streymt frá viðureigninni eins og gert var í dag.
Mörk Hauka: Sigurður Snær Sigurjónsson 6, Skarphéðinn Ívar Einarsson 4, Össur Haraldsson 4, Geir Guðmundsson 3, Brynjólfur Snær Brynjólfsson 2, Andri Fannar Elísson 3, Adam Haukur Baumruk 2, Birkir Snær Steinsson 2, Hergeir Grímsson 2, Þráinn Orri Jónsson 1.
Varin skot: Aron Rafn Eðvarðsson 18, 43%.
Hægt er að sjá upptöku frá leiknum í hlekk hér fyrir neðan.
