„Þetta er tölvuvert sterkara lið en það sem við lékum við á miðvikdaginn. Hinsvegar erum við betri en Færeyingar og eigum klárlega að vinna leikinn. Ef við leikum almennilega þá eigum við ekki að hafa of miklar áhyggjur af hlutunum,“ segir Díana Dögg Magnúsdóttir landsliðskona í handknattleik sem er hvergi banginn fyrir viðureignina við færeyska landsliðið í undankeppni Evrópumótsins í handknattleik, 7. riðli, sem hefst í Höllinni á Hálsi í Þórshöfn klukkan 14 í dag.
„Það eru nokkrir sterkir leikmenn í færeyska liðinu sem við verðum að stöðva og við eigum að vera nógu sterkar til þess að mæta þeim,“ sagði Díana Dögg sem segir fullt sjálfstraust ríkja innan íslenska hópsins fyrir leikinn í dag.
„Við erum fullar sjálfstrausts, erum öflugar og getum leikið mjög vel. Takist það verður erfitt að brjóta okkur á bak aftur. Þetta er lykilleikur fyrir okkur til þess að ná markmiðinu sem við stefnum öll að, það er að komast í lokakeppni EM á næsta ári,“ sagði Díana Dögg Magnúsdóttir landsliðskona í stuttu samtali við handbolta.is fyrir æfingu íslenska landsliðsins í Þórshöfn síðdegis í gær.
Sem fyrr segir hefst viðureign Íslands og Færeyja klukkan 14 í dag og verður m.a. hægt að fylgjast með í útsendingu RÚV. Þá hyggst handbolti.is vera með textalýsingu en í ljós á eftir að koma hvernig vinnuaðstaða verður í keppnishöllinni til þess.
