Tvær tillögur um breytingar á keppni í efstu deild kvenna liggja fyrir ársþingi Handknattleikssambands Íslands sem fram fer í Laugardalshöll á sunnudaginn.
Annars vegar leggur Fjölnir til að leikið verði í einn deild kvenna með allt að 16 liðum. Hinsvegar vill KA/Þór að liðum verði fjölgað um tvö í efstu deild kvenna, Olísdeild og að þau verði 10 í stað átta. Það er mat KA/Þórs að með breytingunni verði til fleiri leikir sem skipta máli sem m.a. verði til þess að hvetja félögin til að leggja meiri áherslu á handknattleik í flokkum kvenna.
A- og B-úrslitakeppni
Í tillögu Fjölnis um eina deild er lagt til að eftir að deildarkeppni með tvöfaldri umferð verði lokið taki við úrslitakeppni átta efstu liðanna um Íslandsmeistaratitilinn. Um leið verði tekin upp B-úrslitakeppni fyrir liðin í sætum frá níu og niður úr.
KA/Þór vill koma á 10 liða úrvalsdeild kvenna með átta liða úrslitakeppni í lokin. Liðið í 10. og neðsta sæti falli niður og liðið sem hafnar í níunda sæti fari í umspil við liðið sem hafnar í öðru sæti næst efstu deildar.
Fleiri leikir sem skipta máli
Í greinargerð með tillögu KA/Þórs segir: „Við óskum eftir að deildarkeppni kvenna verði áfram í tveimur deildum en að í efstu deild verði 10 lið, sem leika í tvöfaldri umferð, þar sem efsta liðið verður Íslandsmeistari, neðsta liðið fellur í 2. deild og liðið í 9. sæti fer í umspil við lið nr. 2 í 2. deild um réttinn til að leika í efstu deild að ári. 8 efstu liðin í 1. deild fara í úrslitakeppni eins og er hjá körlum. Við teljum að með þessu verði fleiri leikir sem skipta máli og fleiri lið sem þurfa að hlúa betur að kvennaboltanum.“
