Einar Rafn Eiðsson, KA, var besti leikmaður Olísdeildar karla í fyrstu 13. umferðunum samkvæmt samantekt tölfræðiveitunnar HBStatz sem birt var á Facebook og fleiri samfélagsmiðlum í dag.
HBStatz birtir lið fyrri hluta tímabilsins í tilefni þess að 13 af 22 umferðum er lokið og framundan er hlé á keppni í Olísdeild karla fram til 1. febrúar.
Liðið er tekið saman úr tölfræði sem safnað hefur verið saman í leikjum liðanna í deildinni.
Besti sóknarmaðurinn var Eyjamaðurinn Elmar Erlingsson og félagi hans Ísak Rafnsson skaraði fram úr öðrum varnarmönnum deildarinnar. Besti markvörðurinn var Björgvin Páll Gústavsson, Val.
Sjö manna úrvalslið HBStatz er auk Einars Rafns, Elmars, Björgvins Páls og Ísaks skipað Starra Friðrikssyni, Stjörnunni, Jakobi Inga Stefánssyni, Gróttu, Halldóri Inga Óskarssyni, Víkingi og Guðmundi Braga Ástþórssyni, Haukum.
Athyglisvert er að markahæsti leikmaður Olísdeildar, landsliðsmaðurinn Þorsteinn Leó Gunnarsson er á meðal þeirra sem verða að gera sér að góðu að vera utan liðsins. Þá er Aron Pálmarsson, FH, varamaður.
