ÍBV steinlá fyrir Haukum, 38:17, í upphafsleik 9. umferðar Olísdeildar kvenna í handknattleik á Ásvöllum í gær. Haukar, sem eru einir efstir í Olísdeildinni eftir leikinn, voru með 11 marka forskot að loknum fyrri hálfleik, 21:10.
Vegna afar mikilla skakkfalla af ýmsum ástæðum þá stillti ÍBV upp táningaliði í leiknum. Styr hefur staðið yfir síðustu daga um það hvort leikurinn ætti að fara fram eða ekki en ÍBV hafði óskað eftir frestun á viðureigninni. Köpuryrði hafa fallið í hita leiksins. M.a. sparaði Sigurður Bragason þjálfari ÍBV síst stóru orðin í samtali við Vísir.
ÍBV heldur af stað til portúgölsku eyjarinnar Madeira í dag til tveggja viðureigna í 32-liða úrslitum Evrópubikarkeppninnar á laugardag og sunnudag.
Staðan og næstu leikir í Olísdeildum.
Mörk Hauka: Sara Katrín Gunnarsdóttir 8, Birta Lind Jóhannsdóttir 5, Elín Klara Þorkelsdóttir 5, Ragnheiður Ragnarsdóttir 4, Rakel Oddný Guðmundsdóttir 3, Thelma Melsted Björgvinsdóttir 2, Alexandra Líf Arnarsdóttir 2, Rósa Kristín Kemp 1, Berglind Benediktsdóttir 1, Ragnheiður Sveinsdóttir 1, Sonja Lind Sigsteinsdóttir 1.
Varin skot: Margrét Einarsdóttir 12, 54,5% – Elísa Helga Sigurðardóttir 8/2, 53,3%.
Mörk ÍBV: Agnes Lilja Styrmisdóttir 5, Amelía Einarsdóttir 4/1, Ásdís Guðmundsdóttir 3, Margrét Björg Castillo 2, Sara Dröfn Ríkharðsdóttir 1, Birna María Unnarsdóttir 1, Birna Dís Sigurðardóttir 1.
Varin skot: Réka Edda Bognár 5, 11,8%.
