Guðmundur Þórður Guðmundsson og lærisveinar hans í danska úrvalsdeildarliðinu Fredericia HK unnu Nordsjælland, 31:26, á heimavelli í síðustu umferð dönsku úrvalsdeildarinnar í dag. Fredericia HK hefur verið nær óstöðvandi og mætir væntanlega af fullum krafti í úrslitakeppnina sem hefst í vikunni eftir páska.
Halldór Jóhann Sigfússon er þjálfari Nordsjælland sem hafnaði í næst neðsta sæti deildarinnar, stigi á undan Lemvig sem fellur. Lemvig tapaði fyrir deildarmeisturum Aalborg Håndbold í dag, 35:28.
Umspilskeppni framundan
Framundan er keppni á milli Nordsjælland, Kolding, Holstebro, SønderjyskE og Skanderborg AGF um að forðast umspilsleiki við liðið sem hafnar í öðru sæti næst efstu deildar.
Fredericia HK er á hinn bóginn á leiðinni í úrslitakeppni um danska meistaratitilinn en fyrsta stig úrslitakeppninnar verður leikin í tveimur fjögurra liða riðlum.
Einar Þorsteinn Ólafsson lék afar vel fyrir Fredericia HK í dag. Hann skoraði tvisvar sinnum og átti þrjár stoðsendingar.
Riðlakeppni efri liðanna Riðill 1: Aalborg Håndbold - byrjar með 2 stig. Bjerringbro-Silkeborg - byrjar með 1 stig. Mors-Thy - byrjar án stiga. Ribe-Esbjerg - byrjar án stiga. Riðill 2: Fredericia - byrjar með 2 stig. GOG - byrjar með 1 stig. Skjern Håndbold - byrjar án stiga. TMS Ringsted - - byrjar án stiga.
Ribe-Esbjerg tapaði
Elvar Ásgeirsson skoraði eitt mark og átti eina stoðsendingu þegar Ribe-Esbjerg tapaði í heimsókn til Ringsted, 30:27. Ágúst Elí Björgvinsson varði sjö skot í marki Ribe-Esbjerg þann tíma sem hann stóð á milli stanganna, 35%. Ágúst varði eitt vítakast.
Ribe-Esbjerg hafnaði í áttunda sæti deildarinnar. Liðið hafði þegar tryggt sér sæti á meðal átta efstu fyrir leikinn í Ringsted.
Arnór Atlason og liðsmenn TTH Holstebro töpuðu fyrir SønderjyskE á Suður-Jótalandi í lokaumferðinni, 34:29. Holstebro varð í 11. sæti af 14 liðum.
Lokastaðan:
