Ekkert mál hjá Magdeburg í Jedda

SC Magdeburg er komið í undanúrslit á heimsmeistaramóti félagsliða sem stendur yfir þessa dagana í Jedda í Sádi-Arabíu. Magdeburg vann Al Duhail frá Katar í morgun, 35:23, eftir að hafa verið sjö mörkum yfir í hálfleik, 16:9. Lið Al Duhail er ríkjandi Asíumeistari félagsliða.

Magdeburg mætir annað hvort Aalborg Håndbold eða Al-Wehda frá Sádi-Arabíu í undanúrslitum en liðin leiða saman hesta sína síðar í dag.

Í gær vann Magdeburg Sydney University frá Ástralíu með 12 marka mun í fyrstu umferð.

Ómar Ingi Magnússon skoraði fimm mörk í dag fyrir Magdeburg. Gísli Þorgeir Kristjánsson skoraði eitt mark.

Leikmenn Magdeburg voru seinir í gang í morgun en eftir að þeir náðu 9:1 kafla þegar á leið fyrri hálfleikinn var ljóst að leikmenn Al Duhil stæðu þeim ekki á sporði.