- Auglýsing -

Ekki nógu kaldar í lokin

„Það hefði verið mjög sætt að ná öðru stiginu en því miður voru stelpurnar ekki nógu kaldar í lokin þegar við fengum síðustu sóknina. Ungu stúlkunum og Kristínu Guðmundsdóttir langaði svo svakalega í stigið að það fór bara allt í baklás í síðustu sókninni,“ sagði Halldór Harri Kristjánsson, þjálfari HK, eftir eins marks tap liðsins fyrir Fram í Framhúsinu í kvöld, 25:24, í fyrstu umferð Olísdeildar kvenna í handknattleik.


„Áætlunin var að leika kerfi sem hafði gefist vel, bíða aðeins, þar til nær drægi leikslokum en kannski ekki alveg eins lengi og raun varð á og þá greip um sig örvænting. Maður þarf að þora í svona stöðu,“ sagði Harri ennfremur.


„Þessi leikur gefur vissulega einhver fyrirheit um jafna deild í vetur en á móti kemur og því má ekki gleyma að við áttum ágætt tímabil í fyrra og höfnuðum í fjórða sæti. Það er ekki gefið fyrirfram að við töpum fyrir Fram. Metnaðurinn er fyrir hendi innan míns liðs en við skulum bíða og sjá hvernig tímabilið í heild þróast,“ sagði Halldór Harri Kristjánsson, þjálfari kvennaliðs HK.

- Auglýsing -
- Auglýsing -

Nýjustu fréttir

- Auglýsing -