Handknattleikskonan Elín Klara Þorkelsdóttir var í gær valin íþróttakona Hauka á viðurkenningarhátíð sem haldin var á Ásvöllum. Þetta var önnur viðurkenningin sem landsliðskonan unga hlýtur á nokkrum dögum því hún var einnig valin íþróttakona Hafnarfjarðar á milli jóla og nýárs.
Fleiri úr röðum handknattleiksfólks fengu viðurkenningu á hátíðinni í gær því Díana Guðjónsdóttir var valin annar af tveimur þjálfurum ársins hjá Haukum. Díana hefur um langt árabil komið að þjálfun flestra flokka hjá handknattleiksdeild Hauka og var m.a. þjálfari meistaraflokks kvenna á síðari hluta síðasta tímabil. Hauka léku þá til undanúrslita um Íslandsmeistaratitilinn en töpuðu naumlega fyrir ÍBV.
Elín Klara er burðarás í liði Hauka og var í lok Íslandsmótsins í vor valin besti leikmaður Olísdeildar kvenna. Hún er markahæst í Olísdeildinni um þessar mundir. Elín Klara var í stóru hlutverki í U19 ára landsliðinu á EM í sumar. Hún átti sæti í A-landsliðinu sem valið var fyrir HM í nóvember en meiddist nokkrum dögum fyrir brottför og varð að draga sig úr hópnum af þeim sökum.
Frekar upplýsingar og fleiri myndir frá viðurkenningarhátíð Hauka er að finna á Facebooksíðu félagsins.
