Elísa Helga Sigurðardóttir, annar af markvörðum Olísdeildarliðs Hauka hefur framlengt samningi sínum við félagið til næstu tveggja ára, þ.e. út leiktíðina vorið 2026.
Elísa Helga, sem er ennþá í 3. flokki hefur verið annar tveggja markvarða meistaraflokks undanfarin tvö ár og hefur farið stöðugt vaxandi. Auk þess að leika með Haukum hefur Elísa Helga einnig verið með yngri landsliðum Íslands og var m.a. í U19 ára landsliðinu á EM í Rúmeníu á síðasta ári. Hún hefur einnig verið í æfingahópi U20 ára landsliðsins í vetur en framundan er þátttaka á HM í síðari hluta júní.
„Haukar fagna áframhaldandi veru Elísu hjá félaginu og verður gaman að fylgjast með henni áfram verja mark Hauka,“ segir í tilkynningu Haukar Topphandbolti.
Elísa Helga og félagar í Haukum taka á móti ÍR í 21. og síðustu umferð Olísdeildar á Ásvöllum á laugardaginn. Haukar eru í harðri baráttu við Fram um 2. sæti deildarinnar en liðin eru jöfn að stigum.
Staðan og næstu leikir í Olísdeildum.
