Gummersbach vann annan leik sinn í röð í þýsku 1. deildinni í handknattleik í kvöld þegar liðið lagði HC Erlangen á heimavelli, 33:28. Eftir skrykkjótt gengi í fyrstu leikjunum er vonandi að Gummersbach-liðið sé að ná sér á strik.
Flensburg vann Bergischer HC með sömu markatölu í Flens-Arena í kvöld og í þriðja leik kvöldsins lagði Rhein-Neckar Löwen liðsmenn Balingen-Weilstetten, 25:21, í Mannheim.
Elliði Snær Viðarsson skoraði fimm mörk fyrir Gummersbach sem var tveimur mörkum undir að loknum fyrri hálfleik, 15:13.
Teitur Örn Einarsson skoraði ekki mark en átti eina stoðsendingu fyrir Flensburg-liðið í sigurleiknum á Bergischer, 33:28. Arnór Þór Gunnarsson er aðstoðarþjálfari Bergischer.
Oddur Gretarsson skoraði fimm mörk, þar af fjögur úr vítaköstum, fyrir Balingen-Weilstetten í tapi, 25:21, í heimsókn til Rhein-Neckar Löwen sem vann sinn þriðja leik í röð á einni viku.
Daníel Þór Ingason skoraði tvisvar sinnum fyrir Balingenliðið.
Hvorki Ýmir Örn Gíslason né Arnór Snær Óskarsson skoruðu fyrir Rhein-Neckar Löwen. Báðum var vikið einu sinni af leikvelli.
