Elvar Örn tekur ekki þátt í fleiri leikjum á tímabilinu

Elvar Örn Jónsson landsliðsmaður í handknattleik leikur ekki fleiri leiki með þýska handknattleiksliðinu MT Melsungen á yfirstandandi leiktíð. Hann meiddist á ökkla á æfingu fyrir viku og verður frá keppni í fimm til sex vikur.

Frá þessu var greint á heimasíðu Melsungen á síðasta miðvikudag. Ljóst er að handbolti.is hefur algjörlega sofnað á verðinum að þessu sinni.

Skarð er svo sannarlega fyrir skildi af fjarveru Elvars Arnar enda hefur hann leikið stórt hlutverk hjá MT Melsungen, jafnt í vörn sem sókn. Fleiri leikmenn liðsins eru á sjúkralista.

Melsungen er í níunda sæti þýsku 1. deildarinnar þegar fjórar umferðir eru eftir óleiknar.