Rétt eftir að stytt hafði upp eftir rigningu, þrumur og eldingar ók öllum að óvörum sendiferðbíll hlaðinn töskum upp að andyri hótels íslenska U19 ára landsliðs kvenna í Pitesti í Rúmeníu nú upp úr hádeginu. Var þar kominn farangur íslenska landsliðsins sem skilinn var eftir í Amsterdam í fyrradag þegar íslenska liðið flaug áfram til Búkarest til þátttöku á Evrópumeistaramótinu sem hófst í dag í Pitesti og Mioveni í Rúmeníu.
Eins og nærri má geta braust út mikil gleði meðal allra í íslenska hópnum að fá loksins farangurinn og þar með næg föt til skiptanna auk keppnisbúninga, sjúkravara, klísturs og fleira. Reyndar hafði móðir einnar í hópnum komið til Pitesti í nótt og haft meðferðis eitt sett af keppnisbúningum.
Allt er gott sem endar vel. Íslenska landsliðið er þar með klárt í slaginn við landslið Rúmeníu í upphafsleik sínum í B-riðli Evrópumótsins. Leikurinn hefst klukkan 16.45 og verður fylgst með í textalýsingu á handbolta.is.
![](https://handbolti.is/wp-content/uploads/2023/07/358778155_972966057362113_4955333594126524714_n-768x1024.jpg)
![](https://handbolti.is/wp-content/uploads/2023/07/358649140_229611309916344_3171144447250667332_n-768x1024.jpg)
![](https://handbolti.is/wp-content/uploads/2023/07/358537454_218546537319308_7302593652962159967_n-768x1024.jpg)
![](https://handbolti.is/wp-content/uploads/2023/07/358503472_299521689089288_8097262950544685098_n-576x1024.jpg)