Lítt kom á óvart að Ungverjaland varð í dag Evrópumeistari í handknattleik kvenna, liðum skipuðum 19 ára og yngri. Ungverska landsliðið vann danska landsliðið með níu marka mun í úrslitaleik, 35:26. Danir syndu tennurnar í fyrri hálfleik og voru þremur mörkum yfir í hálfleik, 17:14. Í síðari hálfleik dugði lítt að sýna tennurnar gegn ógnarsterku liði Ungverja sem vann alla leiki sín í mótinu á sannfærandi hátt.
Þetta er í þriðja sinn í röð sem Ungverjar fagna sigri á Evrópumóti 19 ára landsliða kvenna. Emilia Varga varð markahæst með 11 mörk. Julie Scaglione skoraði einnig ellefu sinnum fyrir danska landsliðið
Rúmenar hlutu bronsverðlaun á heimavelli. Lið þeirra vann Portúgal örugglega, 39:32, eftir að hafa verið fimm mörkum yfir í hálfleik, 18:13. Eftir mjög góða leiki á mótinu þá sprakk protúgalska liðið á limmunni í dag eftir vonbrigðin að tapa fyrir Dönum í undanúrslitum eftir vítakeppni.
Röð liðanna á mótinu:
| 1. | Ungverjaland | 9. | Holland |
| 2. | Danmörk | 10. | Noregur |
| 3. | Rúmenía | 11. | Þýskaland |
| 4. | Portúgal | 12. | Tékkland |
| 5. | Svíþjóð | 13. | Ísland |
| 6. | Frakkland | 14. | Serbía |
| 7. | Sviss | 15. | N-Makedónía |
| 8. | Svartfjallaland | 16. | Króatía |
Ítalía og Spánn unnu B-keppnina
B-keppni Evrópumótsins fór fram í tveimur hlutum, annarsvegar í Kósovó og hinsvegar í Litáen. Ítalía vann Austurríki í úrslitaleik í þeim hluta sem fram fór í Pristina í Kósovó, 29:21.
Spánverjar stóðu uppi sem sigurvegarar í keppninni í Litáen. Spænska liðið vann Færeyinga, 34:23, í úrslitum í dag.
Spánn og Ítalía ásamt Serbíu og Króatíu mætast í undankeppni í nóvember um eitt laust sæti á HM 20 ára landsliða sem fram fer í Skopje í Norður Makedóníu að ári liðnu.
