Valur er kominn í undanúrslit Olísdeildar karla í handknattleik eftir annan öruggan sigur á vængbrotnu Framliði, 36:24, í Lambhagahöllinni í Úlfarsárdal í dag. Valur hafði fimm marka forskot að loknum fyrri hálfleik, 18:13. Samanlagt vann Valur leikina tvo með 30 marka mun.
Valur mætir sigurliðinu úr rimmu Aftureldingar og Stjörnunnar í undanúrslitum sem hefjast eftir um 10 daga. Næsta verkefni Vals er Evrópuleikur við Baia Mare frá Rúmeníu annan sunnudag.
Valsliðið gerði það sem þurfti í fyrri hálfleik í Lambhagahöllinni. Flestir af betri leikmönnum liðsins tóku slaginn og unnu upp gott forskot. Fljótlega í síðari hálfleik jókst munurinn og var fljótlega kominn í 10 mörk og hélst þannig allt til loka.
Sjúkralisti Framliðsins er langur. Meiðsli komu mjög niður á liðinu í síðustu leikjum deildarkeppninnar og varð þess valdandi að lokaspretturinn og úrslitakeppnin varð endaslepptari en vonir stóðu til. Karlalið Fram er þar með komið í sumarfrí en framundan er úrslitakeppni hjá kvennaliði félagsins.
Mörk Fram: Dagur Fannar Möller 8, Rúnar Kárason 6, Ívar Logi Styrmisson 6/4, Bjartur Már Guðmundsson 2, Theodór Sigurðsson 1, Arnar Snær Magnússon 1.
Varin skot: Breki Hrafn Árnason 3, 23,1% – Arnór Máni Daðason 3, 18,8% – Lárus Helgi Ólafsson 2, 13,3%.
Mörk Vals: Agnar Smári Jónsson 8, Benedikt Gunnar Óskarsson 6/1, Andri Finnsson 6, Alexander Peterson 5, Tjörvi Týr Gíslason 2, Bergur Elí Rúnarsson 2, Vignir Stefánsson 2, Úlfar Páll Monsi Þórðarson 2, Róbert Aron Hostert 1, Aron Dagur Pálsson 1, Magnús Óli Magnússon 1.
Varin skot: Björgvin Páll Gústavsson 7, 26,9% – Arnar Þór Fylkisson 5/1, 50%.
