- Auglýsing -
„Ég er sem betur fer ekki brotin en um mjög slæma tognun er að ræða og bólga myndaðist á milli litlu beinanna í úlnliðnum,“ sagði Díana Dögg Magnúsdóttir landsliðskona í handknattleik og leikmaður þýska liðsins BSV Sachsen Zwickau í dag þegar hún var nýkomin úr læknisskoðun.
Eins og kom fram á handbolta.is varð Díana Dögg að fara meidd af leikvelli í síðari hálfleik í viðureign BSV Sachsen Zwickau og Thüringer HC í þýsku 1. deildinni í gærkvöld. Díana Dögg hafði þá meiðst á úlnilið og kom ekkert meira við sögu.
„Ég er í spelku eins og er og við verðum bara að sjá hvað setur,“ sagði Eyjakonan ennfremur. Ómögulegt er að segja hvaða áhrif meiðslin hafa á þátttöku Díönu Daggar í bikarleik við Göppingen eftir rúma viku og í deildarleik gegn Bayer Leverkusen laugardaginn 22. október. Það verður síðasti leikur BSV Sachsen Zwickau áður en hlé verður gert á keppni í þýsku 1. deildinni vegna Evrópumeistaramótsins sem hefst 3. nóvember.
- Auglýsing -
