Eftir tap fyrir japanska landsliðinu í gær þá hrósuðu lærisveinar Erlings Richardssonar í hollenska landsliðinu sigri í dag á landsliði Túnis, 33:28, á fjögurra liða móti í Gdansk í Póllandi.
Hollenska landsliðið var með sex marka forskot að loknum fyrri hálfleik, 18:12. Hollendingar verða með íslenska landsliðinu í riðli í riðlakeppni Evrópumótsins í Ungverjalandi í næsta mánuði.
Rutger ten Velde fór á kostum í hollenska landsliðinu í dag. Hann skoraði 10 mörk.
Landslið Túnis vann pólska landsliðið með fjögurra marka mun á mótinu í gær, 30:26, og leikur í kvöld við japanska landsliðið sem leikur undir stjórn Dags Sigurðarssonar.
Lokaumferð mótsins fer fram á morgun. Þá leikur hollenska liðið við pólska landsliðið. Dagur og leikmenn japanska landsliðsins mæta þá landsliði Túnis. Japanska landsliðið er að búa sig undir þátttöku í Asíumeistaramótinu sem fram fer í Sádi Arabíu eftir miðjan næsta mánuð.
