„Það er ljóst að við erum endanlega fallnir eftir þennan leik en það var svo sem fyrir löngu orðið ljóst hvert stefndi. Kannski er það bara léttir fyrir mína menn að örlögin liggi nú fyrir. Það getur vel verið,“ sagði Kristinn Björgúlfsson, þjálfari karlaliðs ÍR, við handbolta.is í gærkvöld eftir tap liðsins fyrir Gróttu, 32:26, í 17. umferð Olísdeildar karla í Austurbergi. Tapið sendi ÍR niður um deild. Héðan af eru liðinu allar bjargir bannaðar en liðið er enn á stiga í neðsta sæti.
„Kannski minnkar pressan á mönnum eða kannski var engin pressa,“ sagði Kristinn sem undirstrikar að markmiðið hafi verið vinna Gróttu og ná þar með að minnsta kosti einum sigri áður en Olísdeild verður kvödd. Það átti ekki fyrir ÍR-ingum að liggja að þessu sinni að vinna. „Við erum bara ekki betri en raun ber vitni um. Málið er ekkert flóknara. Því fór sem fór.”
Kristinn er vonsvikinn út í leikmenn sem hafi ekki haft þor til þess að vinna leiki. „Menn leika svo sem það sem fyrir þá er lagt en hafa ekki þor þegar á hólminn er komið. Þá kikkna menn í hnjánum. Í kvöld þá lögðu leikmenn Gróttu einfaldlega meira á sig en mínir menn. Grótta vann leikinn í kvöld fyrir dugnað. Þeir lögðu meira á sig en við. Það er staðreynd málsins,“ segir Kristinn og bætir við.
Engin á erindi í Olísdeildina
„Leikmenn ÍR verða að viðurkenna, allir sem einn, þótt súrt sé að þeir eru ekki nógu góðir. Það á enginn leikmaður úr mínu liði erindi í Olísdeildina á næsta keppnistímabili,“ sagði Kristinn sem þegar er farinn að leggja drög að næsta keppnistímabili. Hann segir ljóst í sínum huga að ÍR muni aðeins staldra við í eitt keppnistímabil í Grill 66-deildinni. Stefnan er tekin rakleitt upp. Undirbúningur hefst strax í dag.
Strax í dag
„Undirbúningstímabilið fyrir næstu leiktíð hefst strax á morgun. Það er vel skipulagt og það verður gaman að sjá hvernig menn mæta til leiks,“ sagði Kristinn Björgúlfsson, þjálfari ÍR, þungur á brún í samtali við handbolta.is í Austurbergi í gærkvöld.
