„Ég er yfirhöfuð ánægður með spilamennskuna hjá okkur til þessa. Við erum á þeim stað sem við viljum vera,“ sagði Gunnar Magnússon þjálfari karlaliðs Aftureldingar í samtali við handbolta.is í gær spurður út í stöðu liðsins um þessar mundir. Afturelding er efst í Olísdeildinni með 11 stig að loknum sjö leikjum, fimm sigurleikir, eitt jafntefli og eitt tap.
Stigin verða ekki tekin af okkur
„Það er reyndar ennþá bara október og langur tími eftir af keppnistímabilinu. Stigin verða hinsvegar ekki af okkur tekin,“ sagði Gunnar og brosti í kampinn.
Aftureldingarliðið gekk í gegnum miklar breytingar í sumar. Ekki færri en níu leikmenn réru á önnur mið en í staðinn komu fimm leikmenn. Til viðbótar hafa yngri leikmenn fengið aukið hlutverk. Afturelding nýtur þess að hafa átt öflug lið í þriðja og fjórða flokki sem hafa m.a. verið undir handarjarðri Stefáns Árnasonar. Stefán hefur unnið ötulega síðan hann kom til félagsins fyrir hálfa þriðja ári.
Teflir hiklaust fram yngri leikmönnum
Gunnar segir kærkomið að geta nýtt yngri leikmenn í talsverðu mæli í leikjum á sama tíma og vel gangi á leikvellinum. Á lokakafla leiksins í gær við ÍBV og gegn HK í síðustu viku var uppistaða Aftureldingarliðisins á leikvellinum skipuð piltum úr þriðja flokki.
„Þeir spila mikið með okkur í hverjum leik. Þetta eru alvöru leikmenn, þeirra er framtíðin. Við höfum gefið þeim veigamikil hlutverk og veitt þeim traust frá fyrsta leik í haust. Þeir hafa staðið undir væntingum,“ sagði Gunnar Magnússon þjálfari Aftureldingar, toppliðs Olísdeildar karla í handknattleik.
Gerðum út um leikinn strax í fyrri hálfleik
