- Auglýsing -

Evrópukeppnin er gulrót fyrir sumaræfingarnar

Aldís Ásta Heimisdóttir, Rakel Sara Elvarsdóttir, Matea Lonac, Sólveig Lára Kristjánsdóttir og Rut Arnfjörð Jónsdóttir leggja á ráðin. Mynd/Egill Bjarni Friðjónsson

„Gulrót leikmanna til að æfa vel í sumar er sú staðreynd að í haust ætlum við að taka þátt í Evrópukeppni félagsliða með að markmiði að öðlast kærkomna reynslu og máta okkur við önnur lið utan landsteinanna,“ sagði Andri Snær Stefánsson, þjálfari Íslands- og deildarmeistara KA/Þórs en liðið hefur ákveðið að láta slag standa í Evrópukeppni félagsliða, Evrópudeildinni, í haust.


KA/Þór var skráð til leiks í Evrópubikarkeppnina á síðasta keppnistímabili og dróst gegn félagsliði frá Ítalíu. Þegar til kastanna átti að koma var útilokað að taka þátt vegna kórónuveirunnar og varð Akureyrarliðið að draga sig úr keppni eftir að ýmsir kostir höfðu verið skoðaðir til þess að koma leikjunum á dagskrá.


„Við förum í keppnina til þess að bæta okkur og hafa gaman að. Vissulega rennum við blint í sjóinn ennþá með andstæðinga og hvenær við komum inn í keppnina en okkur hlakkar til,“ sagði Andri Snær og bætir við að enginn hafi velkst í vafa að láta slag standa og skrá liðið til leiks þótt ljóst sé að kostnaður verði umtalsverður.

KA/Þór verður fyrsta kvennaliðið frá Akureyri til þess að taka þátt í Evrópukeppni félagsliða. Karlalið KA hefur nokkrum sinnum tekið þátt þótt nokkuð sé liðið frá síðustu þátttöku.

Eftir því sem handbolti.is kemst næst eru forráðamenn Vals ákveðnir í að skrá kvenna- og karlalið sín til leiks í Evrópukeppni. Fleiri íslensk félagslið eiga rétt á að taka þátt en það mun skýrast fljótlega eftir helgi hverjir hafa staðfest þátttöku en frestur til skráningar rennur út um mánaðarmótin.

- Auglýsing -
- Auglýsing -

Nýjustu fréttir

- Auglýsing -