Íslandsmeistarar ÍBV luku árinu með stórsigri á Víkingi í íþróttamiðstöðinni í Vestmannaeyjum í dag, 40:22. Þeir gerðu nánast út um leikinn í fyrri hálfleik og voru með níu marka forskot að honum loknum, 19:10.
Ljóst var að Eyjamenn ætluðu ekki að brenna sig á sama soðinu tvisvar, ef svo má segja en þeir töpuðu fyrir Víkingi í fyrri viðureign liðanna í Olísdeildinni í haust.
Sigurinn og stigin tvö sem honum fylgja fluttu ÍBV upp í annað sæti Olísdeildar með 19 stig þegar 13 leikir eru að baki. Valur er stigi á eftir en á leik til góða við Aftureldingu á mánudagskvöld. ÍBV er fjórum stigum á eftir forystuliði FH.
Víkingar kveðja árið næst neðstir með sex stig, jafn mörg stig og Selfoss, en stigi á eftir HK sem er í 10. sæti.
Færeyingurinn Dánjal Ragnarsson lék í síðasta sinn með ÍBV í dag. Hann verður leystur undan samningi að eigin ósk. Dánjal skoraði þrjú mörk í kveðjuleiknum, öll úr vítaköstum.
Gauti Gunnarsson naut lífsins í leiknum enda voru hraðaupphlaup ÍBV-liðsins mörg. Hann varð markahæstur með átta mörk í 11 skotum.
Staðan og næstu leikir í Olísdeildum.
Mörk ÍBV: Gauti Gunnarsson 8, Elmar Erlingsson 5, Breki Þór Óðinsson 4, Dánjal Ragnarsson 3/3, Dagur Arnarsson 3, Gabríel Martinez Róbertsson 3, Kári Kristján Kristjánsson 3, Andrés Marel Sigurðsson 3, Daniel Esteves Vieira 3, Petar Jokanovic 2, Sigtryggur Daði Rúnarsson 2, Ívar Bessi Viðarsson 1.
Varin skot: Pavel Miskevich 8/1, 44,4% – Petar Jokanovic 4, 25%.
Mörk Víkings: Jóhann Reynir Gunnlaugsson 7/2, Sigurður Páll Matthíasson 3, Styrmir Sigurðarson 3, Stefán Scheving Guðmundsson 2, Gunnar Valdimar Johnsen 2, Þorfinnur Máni Björnsson 2, Halldór Ingi Jónasson 1, Kristófer Snær Þorgeirsson 1, Benedikt Emil Aðalsteinsson 1.
Varin skot: Daníel Andri Valtýsson 11, 27,5% – Bjarki Garðarsson 4, 33,3%.
Tölfræði HBStatz.
