Færeyingar láta hendur standa fram úr ermum í bókstaflegri merkingu þegar kemur að byggingu nýrra þjóðarhallar fyrir handknattleik og fleiri innanhússíþróttir.
Á dögunum vann U19 ára landslið karla B-keppni Evrópumeistaramótið í handknattleik karla og leikur í fyrsta sinn í lokakeppni EM 20 ára landsliða á næsta sumri.
Í glæsilegri mótttöku fyrir landsliðið greindi borgarstjórinn í Þórshöfn, Heðin Mortensen, frá því að vinna væri hafin við nýja keppnishöll sem standist alþjóðlegar kröfur, m.a. til handknattleiks. Keppnishöllin á að verða tilbúin eftir tvö ár og á að rísa við Stórutjørn í Þórshöfn. Hún á að rúma 3-4.000 áhorfendur í sæti eftir um hvaða viðburði verður að ræða en einnig á vera aðstaða til tónleika- og ráðstefnuhalds.
Høllin á Hálsi í Þórshöfn er komin til ára sinna, þótt hún sé ekki nærri því eins gömul og þjóðarhöll Íslendinga í Laugardal, stenst ekki kröfur til alþjóðlegra kappleikja í handknattleik fremur en Laugardalshöll. Urðu Færeyingar um tíma að leika heimaleiki sína í undankeppni alþjóðlegra móta í handknattleik í Danmörku. Borgarstjórinn sagði þá staðreynd vera algjörlega óviðunandi sem ekki væri búandi við mikið lengur. Óboðlegt væri að færeysk landslið væru á hrakhólum.
Eftir að kórónuveiran fór að herja á heimsbyggðina fengu Færeyingar undanþágu til að leik alþjóðalega kappleiki sína í Höllinni á Hálsi á nýjan leik.
