Íslandsmeistarar ÍBV í handknattleik karla hafa orðið við ósk Færeyingsins Dánjal Ragnarsson um að hann verði leystur undan samningi við félagið í árslok. Þetta kemur fram í tilkynningu ÍBV. Dánjal leikur sinn síðasta leik með ÍBV á laugardaginn þegar Eyjamenn taka á móti Víkingi í Olísdeild karla í síðasta leik liðanna á árinu.
Dánjal kom til liðs við ÍBV haustið 2021 frá Neistanum í Þórshöfn í Færeyjum og hefur þar með leikið með Eyjaliðinu í hálft þriðja ár og varð Íslandsmeistari í vor. Dánjal hefur skorað 14 mörk í 12 leikjum í Olísdeildinni á þessari leiktíð og skoraði 42 mörk í 18 leikjum á síðasta keppnistímabili.
Í tilkynningu ÍBV segir að Dánjal hafi óskað eftir að vera leystur undan samningi af fjölskylduástæðum. Hann er annar leikmaðurinn í Olísdeildinni sem leystur er undan samningi á nokkrum dögum en nýverið kvaddi Marko Coric lið Fram af sömu ástæðum.
