Færeyjafararnir Egill Már Hjartarson og Victor Máni Matthíasson stimpluðu sig af krafti inn í færeysku úrvalsdeildina í handknattleik í gær í fyrsta leiknum með StÍF frá Skálum þegar liðið sótti Team Klaksvik heim.
Egill Már skoraði níu mörk og Victor Máni bætti við þremur mörkum. Klakksvíkingar höfðu betur, 31:27, eftir að hafa verið sex mörkum yfir að loknum fyrri hálfleik, 16:10.
Egill og Victor komu til StÍF í sumar frá Fjölni. StÍF-liðið hefur góða reynslu af Íslendingum en á síðasta keppnistímabili lék Bjartur Már Guðmundsson með liðinu.
Á sunnudaginn taka leikmenn StÍF á móti meisturum H71 í Høllinni á Skála á Austureyj í annarri umferð úrvalsdeildar.
Auk þeirra Egils Más og Victors Mána eru tveir íslenskir þjálfarar í færeyska handknattleiknum á tímabilinu sem er nýlega hafið. Jakob Lárusson þjálfar Kyndil í úrvalsdeild kvenna og Kristinn Guðmundsson lið EB á Eiði sem er einnig í úrvalsdeildinni. Auk þeirra þá hefur Finnur Hansson um langt árabil verið viðloðand færeyskan handknattleik sem leikmaður og þjálfari. M.a. er Finnur annar þjálfari A-landsliðs kvenna um þessar mundir.
