Fargi var létt af Leonharði Þorgeiri Harðarsyni, leikmanni FH, í gær þegar staðfest var að hann er ekki kviðslitinn. Grunur hafði verið uppi um skeið að hann væri kviðslitinn en niðurstöður myndatöku í gær leiddi í ljós svo er ekki. Talsverðar bólgur eru hinsvegar fyrir hendi sem að sögn Leonharðs verður unnið í að draga úr á næstunni.
Markmiðið er að draga úr bólgunum með sjúkraþjálfun, nálastungum og fleiri þekktum aðferðum á næstu vikum.
„Stefnan hefur verið sett á að koma til baka út á völlinn eftir landsliðspásuna eftir miðjan mars. Ef það tekst fyrir þann tíma verður það bara plús,“ sagði Leonharð við handbolta.is í gær.
Vegna fjarveru Leonharðs Þorgeirs fékk FH Alexander Már Egan að láni frá Fram áður en félagaskiptaglugganum var lokað um nýliðin mánaðarmót.
Leonharð Þorgeir, sem getur jafnt leikið í skyttustöðunni hægra megin og í hægra horni, hefur skorað 33 mörk í 13 leikjum með FH í Olísdeildinni.
Staðan í Olísdeild karla og næstu leikir.